Tunc Agamemnon et Menelaus Atrei filii cum ad Troiam oppugnandam coniuratos duces ducerent, in insulam Ithacam ad Ulixem Laertis filium venerunt, cui erat responsum si ad Troia isset, post vicesimum annum solum sociis perditis egentem domum rediturum. Itaque cum sciret ad se oratores venturos, insaniam simulans pileum sumpsit ed equum cum bove iunxit ad aratrum. Quem Palamedes ut vidit sensit simulare atque Telemachum, filium eius, cunis sublatum, aratro subiecit et ait: <<Simulatione deposita inter coniuratos veni>>. Ulixes fidem dedit se venturum; ex eo Palamedi infestus fuit.